Gajil,Gecil,گجيل
 

گجيل

 
شعر - ناغيل
يازيلار - مقاله لر
اسماعيل جميلينين شعرلري

 


اسماعيل جميلينين شعرلرى

×××××××××××××××××××××××××××××××××


سن آذربايجان سؤيله

 سن آذربايجان سؤيله نه چون آذر به جان اولدون

 اونوتدون اؤز درين دردين، يادين دردين آلان اولدون

 چتين گونلرده ايرانين بلاسيندا يانان اولدون

 وئريب ائولاديني قربان، اؤزون يالقيز قالان اولدون

 ياشيل يوردوم باهار ايکن نه ده ن سولدون خزان اولدون

 کئچن يوز ايلده يوزلر يول دؤيوشدون مين يارا گؤردون

 داياندين ، سينمادين دؤزدون، وفا ائتدين جفا گؤردون

 کيمين چکدين بلاسين سن همان يئرده ن بلا گؤردون

 سويولدون، پاي بؤلوش اولدون ياد اللرله تالان اولدون

 سن آذربايجان سؤيله نه چون آذر به جان اولدون

 دؤيوشدون ، دوشمنه غالب گليب مشروطه ني آلدين

 قيز، اوغلان قهرمانلارلا آدين ديلده ن ديله سالدين

 سونوندا يادلارا اويدون، الي بوش چاره سيز قالدين

 بوتون ايرانه باش اولدون اؤزون باشسيز قالان اولدون

 سن آذربايجان سؤيله نه چون آذر به جان اولدون

 ايگرد ستاريوين قبري اياق آلتيندا غربتده

 آدي سردار ملي دير ولي بوش سؤزده صحبتده

 وطن قوينوندا ياتسايدي ياشاردي اوج عزّتده

 ايناندين فتنه کار يادي اؤزون قبرين قازان اولدون

 سن آذربايجان سؤيله نه چون آذر به جان اولدون

 ائديبدير پاي بؤلوش مرکز سنين پايين اولوبدور چول

 مين ايللر شاه اولساندا، ديلين باغلي اولوبسان قول

 نه يين يوخدور دئيم، يوخدور، قوي اولسون ائللرين يوخسول

 دويوردون اؤزگه لر قارنين ائوينده آج ياتان اولدون

 سن آذربايجان سؤيله نه چون آذر به جان اولدون

 سن اؤز فکرينده اولسايدين، بو گون بو گونده اولمازدين

 وفا سيز يادلارا خاطر، اؤزون مين درده سالمازدين

 کويرين کندلري آباد، سن ويرانه قالمازدين

 گلنده هر جفا تيري بيرينجي سن نشان اولدون

 سن آذربايجان سؤيله نه چون آذر به جان اولدون

 غازان خانلار سراييدين قوجا شرقين چراغيدين

 نظاميلر، فضوليلر، هنر علمين اوجاغيدين

 تمّدونله ترّّّ قيله بيرينجي سن اياغيدين

 يادا وئردين کهر آتين، اؤزون آخسار چاپان اولدون

 سن آذربايجان سؤيله نه چون آذر به جان اولدو

 گووه ن ائولادينا آنجاق، اؤزون قيل دردينه چاره

 کؤنول وئرمه شکر ديللي، هر آن اويناشلي ديلداره

 فيريلداقدير دئسه هر نه بوراخ گئتسين اوزو قاره

 جانين قويدون سؤزون اوسته بو يولدا امتحان اولدون

 سن آذربايجان سؤيله نه چون آذر به جان اولدون

 پريشان سئوگيلي يوردوم سنه قوربان سئوه ن جانيم

 توکنمز وارليغيم سن سن، سنينله وار آديم سانيم

 اؤزون چون بير اؤزون گوستر، ديريلسين شهرتيم شانيم

 گلر آزادليغين عطري او گون کي سن عيان اولدون

 سن آذربايجان بيرده بو خير ايشده گمان اولدون

اسماعيل جميلي

 

گجيل سايتي ركلاملاري وئريلن سايتلارين محتواسيندان سوروملو دئييل.
 بو ركلاملار ايراندا ، آذربايجان سايتلارين آرتيق راق تانيتديرماق اوچون بوردا ويريليب ديلار.


 


گجيل سايتي لينکي وئريلن سايت يا يازيلارين محتواسيندان سوروملو دئييل.

E-mail : webmaster@gajil.20m.com
Copyright © 2003-2004.