|
|
بيز
بوش خياللار کؤلگه سينده
اوست اؤرتولو فريلداقلار بؤلگه سينده
بو گونلرين يابان دؤشدن اميزديريب
يارينلارين ساتانلارين جرگه سينده
آج گؤزلرين ياريشيندا
سؤزجوکلرين بوش توپونون آتيشيندا
وطن وطن دئيب وطن ساتانلار چوخ
اؤزلوگونو كيمليگيني آتانلار چوخ
کور دوشونجه دوستاقيندا
دياز سؤزلر ياتاقيندا
ترس آرزونون باتاقيندا
اؤزلريني به يه ننلر
دونن بو گون يارين
اؤزون حق بيلنلر
ائل آدينا ياد کوپوندن
قارا قازانج گؤزله ينلر
يالنيز نيفرت
آنجاق كينه بسله ينلر
سئوگی نه دير بيلمه ينلر
نغمه لری چئينه ينلر
اؤزلريندن باشقاسيني سئونمزلر
گرچکلری اويغودادا گؤر نمزلر
قايالار تک باشی اوجا
آنلی آچيق چيپلاق اولماق
باهار اوچون يارپاق اولماق
وطن اوچون تورپاق اولماق
ديری ديری ائل يولوندا سس سيز اؤلماق
نئجه اولار بيلنمزلر
گؤزلليگي اؤينمزلر
بيز سئوگيدن يولاچيخان
کدورته قالخان توتان
آيدينليغا ميدان قوران
اؤزگه ليكده اؤزه دؤنن
کؤنوللرده بسته له نيب
قوپوزلاردا سؤزه دؤنن
ائل گولنده چيچكله نيب
بنفشه نرگيزه دؤنن
سئوگيميزه عهديميزه صاديق لريك
حسرتينده يانديقيميز آزادليقا عاشيق لريك
های کوی دگيل ايستگيميز ديلگيميز
سارسيلمايان محبّتله چرپنيری اوره گيميز
يوردوموزون تارلاسيندا دنه دولان سنبللرين
اؤز گولونه نغمه دئين بولبوللرين
اؤز يوردونا بزک اولان
کردی کردی چيچكلرين گوللرين
هارايي دير بو هارای
نغمه سيدير بو نغمه
ده ده قورقود سؤزو واردير بو سؤزده
کوراوغلونون هارايي وار بو سسده
فضولونون نسيمي نين شهريارين
نفسی وار بو نفسده
بابکلرين بايراغی دير بو بايراق
ستارخانين سنگری دير بو دوراق
تومروس آنامدان قاليبدير بو قونداق
اودلار يوردودور بو تورپاق
آذربايجانيندير بو چراغ
كيم به ينميرسه دورسون ايراق
كيم بيزی سئويرسه بويورسون قوناق
بيز اويدورما ناغيللاردا
ديبدن يالان يازيلاردا
باشقالارين کوچوتمکله
اؤزوموزه احسن دئييب ال چالميريق
اولونمايان دويوشلرين ظفريني کوی سالميريق
قوی سئوگيدن صداقتدن اوره گی بوش
جيبي دولو يادلار قولو اولانلارين
گؤزونده بيز يابان اولاق گونده بير آدلا آدلاناق
قارمالانان قاپيميزين بوشلوغوندا
ياشيللانيب قوجا چينار
يوردوموزون سئوگيسيله
کونلوموزده چيچكله نير نازلی باهار
آرزوموزون اوفوقونده اوچوشوللار قارانقوشلار
قاطار قاطار
ديله گلير باياتيلار گرايليلار
تئللی سازلار گنج اوزانلار
بيز سئوگيدن يولا چيخان
کدورته قالخان توتان
محبّته ميدان قوران
ائليميزن يوردوموزون
سئوگيسينده صاديق لريك
حسرتينده يانديقيميز آزادليقا عاشيق لريك
اسماعيل جميلي