|
|
گل سئوگيليم ، گل قاداسی ،گل آزادليق
آی آدينين کؤلگه سينده
ياز عطيرلی خياللاردا
چيچك لنن آرزيلاريم
آی سنسيز ليق سزاقيندا
خزان اولان يوزلر يازيم
گل......
باخيشلاريم سريليبدير يوللارينا
گله جگيم تاپشيريق دير قوللارينا
دوداقلاردان آيريلمازدير ايستگين
بوينو بؤکوک تارلالاردير
نيسان كيمي گليشيني گؤزله ين
يانان سئوداندير شفقده اريين
وقتسيز آخشاملار
يورقون قوشلار
سنی اونودماسين دئيه
قارانليق قودورماسين دئيه
گل سئوگيليم دوزلر اؤزلور
جيران جويور باخيشيني
داغلار تانيرسنله آچان
سولماز چيچك ناخيشيني
وارليقيني سالخيم سويود
بولاغ باشی کؤلگه سينده آختاريری
گل
سنلی آچيلان گولوشلر
سنلی پارلايان باخيشلار
سنلی آلينان اؤپوشلر
ياشايشين قايناقيدير
موتلولوغون قايماقيدير
اولدوزلارين دورااقيدير
آزليقيندا
آزالمازدير ايستگين
يوخلوقوندا
سيلينمزديرديلگين
گل قاداسی
کلبکلر بويانسينلار
گل کنديرلر اوتانسينلار
دوستاقلاردان
قيزيل گوللر بويلانسيللار
گل اوشاقلار
بولودلارا ال ساللاسين
يئريكله يير اووج اووج
ياوان تورپاق گؤروشونه
تامارزيدير دوداق دوداق
ياساق ديليم دئييشينه
گل
سئويملي يارينلارا
بيزی گؤتورسون اوياقليق
گل گول آچسين بو قوراقليق
گل اوزونه حسرت ائليم
ياز يئلي وئرسين قوناقليق
گل
گل آزادليق گل آزادليق
اسماعيل جميلي