ساباحلاری اولمايانلار

 

باجارسالار  اوخلارديلار اولدوزلاری

آيدينليقي باغير ماسين

خياللاری کوف قاپسايان کؤهوللرده دولانانلار

باجارسالار

قويلارديلار قويولاردا آل گونشی

يئني بير گون دوغولماسين

قارانليقدا جانلانانلار – ايشيلتيدا بوغولانلار

باجارسالار قووارديلار ايليق يئلي

کرديلرده بنفشه لر نازلانماسين

گؤزلليگي قينايانلار

باجارسالار

آسارديلار ياشيلليغي قارا قيشين قاپيسيندا

ياز نفسی سينه لرده گوللنمه سين

باجارسالار

سيلرديلر گولوش گولون دوداقلاردان

باغلارديلار فلقه يه نغمه لری

بوغارديلار باخيشلاردا محبتّين پاريلتيسين

سئوينجيله کوسولنلر  

 سئوگی نه دير قانمايانلار

  سئودالانيب يانمايانلار

نه ياخشی کی باجارميرلار   

گونو گوندن يوخسوللاشير کؤنوللری

آندان آنا قيسيرلاشير دويغولاری

زمان سازين چالمايانلار

ساباحلاری اولمايانلار

                                                        اسماعيل جميلي