|
|
تبريزلی " صائبين" غزلينه يازيلان بئشله مه
آخمايير يئرسيز يئره گؤرجک گؤزومدن ياشلار
سيريليب قيندان قلينج تک قصديمه دير قاشلار
عالم عشقی نه بيلسين طعن ائدن عيّاشلار
اولمادی خورشيددن داغلاردا رنگين قاشلار
گؤردولر لعل لبين قان ترله ديلر داشلار
ائتدی بولبول ترک گولشن قويدو يالقيز لولفری
دوشدو رونقدن چيچك سولدو باهارين منظری
خلوت جنّتده گيزلندی اوتانجيندان پری
قيلدی پيدا حکم تقويم کهن گول دفتری
آچديلار تا چهره يه ديلداريمي نقاشلار
سينه يانديقجا غمه افزون قيلار اؤز مهريني
جوشدورار ترس اسسه يئللر شور عشقين بحريني
سئوگيدن غافيل نه بيلسين درد سئودا سرّيني
عاشيق صاديق بيلر سنگ ملامت قدريني
مخزن سلطانه لايقدير بو يارار داشلار
چرخ دوران فيرلانير هر آن يئني يولدا مدام
کسمه امّيدين گتيرمز ظلم زنجيری دوام
تازه بير دوران قورار دوشسه باشا حقّين عوام
يول اگر حقدير چکر يولسوزدان آخر انتقام
ائله تاپشير چيخسالار يولدان اگر يولداشلار
زهد زنجيرينده باغلی ساقی صهبای عقل
کنج خلوتده ثمرسيز عاليم شيدای عقل
جهل غوغاسيندا دوشموش سکّه دن سيمای عقل
اولدو مغلوب هوای نفس استيلای عقل
آلديلار حاكيم اليندن اختيار اوباشلار
حوکم ائدير وقت سيز خزان ياز فصلی يوخدور دارس
بولبوله گولسوز اولوب گلشن قارانليق دار قفس
رونق زهد و ريا قويمور وئريلسين حقّه سس
چون کونول بی نور اولوب مطلق عنان آلير هوس
قاش قارالاندا چيخارلار يووادان خفّاشلار
سيغماسا جانان جفاسی شوقيله جان وتن
هجرده سالماز کسر عاشيق فغانی آهنه
گوهر عشقی تاپار كيم د ؤزسه سئودا دردينه
مهربان اولماز نسيم صبحدم هرگز سنه
شمع تک تا توکمه سن صائب گؤزوندن ياشلار
اسماعيل جميلي