|
بو شعر ((سورو))
آدلي بير قيزا دئييليب كي قزوين دن اوز سئوگيليسين گورمه ك ايچون اردبيل
شهرينه گليب و بير دلي كيمين اردبيلين كوچه لرين اوز سئوگيسيندن اوتور
گزير.
جهنمده بيتن گول
فلكين قانلي
اليندن بير آتيلميش يئره اندي،
بير فلاكت آنانين جان شيره سيندن سودون امدي،
بوللو نيسگيل شله سي چيگنينه آلدي،
تاي توشوندان دالي قالدي،
ساري گول مثلي سارالدي،
گونو تك باغري قارالدي.
خان چوبان سيز
سئله تاپشيرسين اوزون،
يوردوموزا بير سارا گلدي،
بير وفاسيز يار اليندن سانا گلمز ياراگلدي،
بيريازيق قيز،
جان الينده ن جانا گلمز جانا گلدي،
گله جكده ((الموت)) دامنه سينده ن بورايا درمانا گلدي،
بير آدامسيز ((سورو)) آدلي،
الي باغلي،
ديلي باغلي!
((سورو)) كيمدير؟
بير گول دو جهنمده بيتيبدير،
سورو بير دامجي دي گوزده ن آخاراق اوزده ايتيبدير،
سورو يول يولچوسودوراگري ده يوخ دوزده ايتيبدير،
سورو بير مرثيه دير اوخشاياراق سوزده ايتيبدير،
او كونول لرده كي ايتميش دي ازلدن،
اودو گوزده ن ده ايتيبدير،
سورو بير گوزلري باغلي،
اوزو داغلي، سوزو داغلي،
اولوب هاردان هارا باغلي؟
بوشلاييب دوغما
ديارين،
اوموب البته ياريندان،
ال اوزوب هرنه واريندان،
قوخماييب شهريميزين قيشدا آمانسيز بورانيندان،
نه قاريندان،
گزير آواره تاپا يانديريجي دردينه چاره،
تاپا بيلمير،
چوخ سئوير عشقي باشيندان آتا،
آمما آتا بيلمير،
اووا باخ اووچو دالينجا قاچير آمما چاتا بيلمير،
ايش دونوب ليلي دوشوب چوللره مجنون سوراغيندا،
شيرين الده تئشه داغ پارچالايير فرهاد اوتورموش اوتاغيندا،
تشنه لب قو گور نئجه جان وئري دريا قيراقيندا،
وارليقين سون اثري آز قالير ايتسين ياناغيندا،
سانكي بير كوزدو بورولموش كوله وارليق اوجاغيندا،
كوزه يير پيلته كيمين ياغ توكه نيب دير چيراغيندا،
بوي آتير رنج باغيندا، قوجالير گنج چاغيندا،
بير آدامسيز ((سورو)) آدلي،
الي باغلي،
ديلي باغلي!
((سورو جان))
اومما فلكدن،
فلكين يوخدو وفاسي،
نه قدر يوخدو وفاسي،
او قدر چوخدو جفاسي،
كوهنه رقاصه كيمين هر كسه بير جوردور اداسي،
اوآياقدان دوشه ني ايستير آياقدان سالان اولسون،
او تالانميش لاري ايستير گونو گوندن تالان اولسون،
او آتيلميش لاري ايستير هاميدان چوخ آتان اولسون،
او ساتيلميش لاري ايستير قول ائده ركن ساتان اولسون،
نئيله مك قورقو بوجوردور،
فلكين نظمي ازلدن اولوب اضدادينه باغلي،
قاراسيز آغلار اولانماز،
دره سيز داغلار اولانماز،
اولوسوز ساغلار اولانماز،
گره ك هر بير گوزه له بير دانا چيركين ده يارانسين،
بيري انسين يئره گويدن بيري عرشه اوجالانسين،
بيري چالسين ال آياق غم دنيزينده،
بيري ساحيلده سئوينج ايله دايانسين،
بيري ذلت پالازين باشه چكيب ياشادا آنجاق،
بيري نين بختي اويانسين،
بيري قويلانسادا نعمت لره يئرسيز،
بيري ده قانه بويانسين،
آي آدامسيز سورو آدلي،
ساچلاريندان دارا باغلي!
نئيله مك ايش
بئله گلميش،
چور گلنده گوله گلميش،
فلكين اگري كمانيندا اولان اوخ آتيلاندا دوزه دگميش،
ديلسيزين باغريني دلميش،
اگري قالميش دوز اگيلميش،
اونو خوشلار بو فلك ائل ساراسين سئللر آپارسين،
بولبول حسرت چكه رك گول ثمرين يئللر آپارسين،
قئيسي چوللرده قويوب ليلي ني محمللر آپارسين،
خسرو،
شيرين ايله ال اله وئرسين فرهادين قامتين اگسين،
باخاراق چرخ زمان نشئه يه گلسين،
كئفه دولسون،
((سورولار)) سولسادا سولسون،
سيسقا بير اولدوز اگر اولماسا اولدوزلار ايچينده،
بو سماء ظولمته باتماز،
داش آتان كول باشي قويموش داشيني اوزگه يه آتماز،
سن يئتيشسن هدفه اوندا فلك مقصده چاتماز،
داها افسانه ياراتماز،
((سورو)) آي باشي بلالي،
زامانين قانلي غزالي!
((سورو)) بير
قوشدور خزان آيري ساليبدير يوواسيندان،
ال اوزوبدور آتاسيندان،
جوجه دير حيف اولا سود گورمه ييب اصلأ آناسيندان،
او زليخا كيمي يوسيف ايين آلمير ليباسيندان،
بونا قانع دير تنفس ائله يير يار هاواسيندان،
درد وئره ن درده ساليب آمما خبر يوخ داواسيندان،
آغلاييب سيتقاياراق بهره آپارمير دوعاسيندان،
او بير آيينه دير رسام چكيب اوستونه زنگار،
اوندا يوخ قدرت گفتار،
اوزو چيركين ديلي بيمار،
گنج وقتينده دل آزار،
گوره سن كيمدي خطاكار،
گوره سن كيمدي خطاكار!؟
((اردبيللي
عاصم))
|
