Gajil,Gecil,گجيل
 

گجيل

 


 قنددن شكايت

وور وار گوجووي گدايه اي قند                                      جاهل دوزه ر هر جفايه اي قند
ـــــــــــــــــــــــــــــــــــــــــــــــ

لاكن قوجاليب  بيزيم تكذبان
ائيلر اوني فرقتون پريشان
سورتمور اوزونه داهي او كيرشان
رحم ائيله تكذ خالايه اي قند

افلاكه طرف مثال بالون
پرواز ائديسن، نه دير خيالون؟
ان گل آشاغا، گوروم جمالون
چيخما، ائله چوخ اوجايه اي قند

چاي حرمله تك آليب اله اوخ
نه تشنه قانير، نه آج، ونه توخ
بي رحمدي شمر دونيدن چوخ
لعنت بئله بي حيايه اي قند

وار حقي فقير بي قرارين
چرخين قيرا، چرخ كجمدارين
گئچسه ايدي ايشي (عقيل) زارين
كوسمه زدي او مرتضايه اي قند

آخير فقراي چاي و سيسبك
عريان قالاجاق چولاخ غافار تك
آقا بويوروركي چايدان ال چك
هر وقت ائديرم گلايه اي قند

اوچ يوز وئريلير وكيله هر آي
اينجيتمير اوني ترقي چاي
منله وكلا اولايدي گر تاي
ائيلردي مني حمايه اي قند

گئتديم گؤيه كي بير آز آلام چيت
جبرييل دئدي: اوغلان ايتيل گئت
سن سويله كي كلفتي باسيب بيت
گئتسن طرف خدايه اي قند

اي كاش بولئيديم اول كار
ممكن دئييل ترك چاي و سيگار
آخير نه بيليم، مني بو سموار
قوربان آپارار منايه اي قند

گر قئينه مييه سحر سماور
چاي ائتمييه منزلي معطر
ممكن دئييل كبله ملا قنبر
قرآن اوخيا، بير آيه اي قند

چون آچدي سحر گوزون اوشاقلار
فنجاني ني گوردي بوش، يالاخلار
ائيله چيغيرار او پيس قوناقلار
كي، قونشي گله ر هارايه اي قند

عطار دئدي: قند اگر بخواهي
پونزاسي ايگيرمي يئددي شاهي
ووردوم يئره حيرصيلن، كلاهي
اوج ائيله دي توز هاوايه، اي قند

يالوارما عبث يئره خدايه
وئرمه ز او ياريم شاهي دعايه
آرتيق پولون اولسا، وئر دوايه
وئرمه پولووي دعايه، اي قند

ترياكي يه بير اولوبدي چاره
قوي بير خوميه، آپار مزاره
بير ايل سورا يوكله بو حماره
گونده ر گئده كربلايه اي قند

چوخ خوشدي دئييرله باغ رضوان
آل بير قوطي چاي، بئش آلتي فنجان
بير دانه قوري، بير آز قولونجان
بورج ائيله گئچه ك اوتايه، اي قند

قويما يانا((معجزين)) چيراغي
بير بستي سو توك، سؤنه اوجاغي
آل دستيوه قت قيران، پيچاقي
كس باشيني، وور جدايه اي قند

شبسترلي معجز
 

گجيل سايتي ركلاملاري وئريلن سايتلارين محتواسيندان سوروملو دگيلدير.
 بو ركلاملار ايراندا ، آذربايجان سايتلارين آرتيق راق تانيتديرماق اوچون بوردا ويريليب ديلار.


 


گجيل سايتي لينکي وئريلن سايت يا يازيلارين محتواسيندان سوروملو دگيلدير.

E-mail : webmaster@gajil.20m.com
Copyright © 2003-2004.