|
|
ايمانيله گئتدي
يغدي خير و بركت سفره سين، احسانله گئتدي
امن-امانليف دا يوكون باغلادي، ايمانله گئتدي
بيگ-خان اولمازسا دئيه رديك اولاجاق كنديميز آباد
او خراب كتده ، و لاكن ائله بيگ-خانله گئتدي
(سيلو)داير اولالي، هر نه دگيرمان ييغيشيلدي
آمما خالص-تميز اونلاردا،دگيرمانله گئتدي
مستبد سلطاني سالدوق، كي اولا خلقميز آزاد
سونرا باخديق كي آزادليق دا او سلطانيله گئتدي
بير (بلي قربان!) اولوب ايندي بيزه مين بلي قربان
آمما (خلعت وئرن) اول بير بلي قربانله گئتدي
دوز مسلمانه ديئيرديك:قولاغي توكلودي بدبخت
ايندي باخ، گور كي او دوزلوك ده ، مسلمانله گئتدي
وئرمه(صابر)دئدي، او دولما-فسنجاني آخوندا
آغزيميزدان دا داد، اول دولما- فسنجانله گئتدي
دئدي انسانيمز آزدير، هامي انسان گرك اولسون
آمما انسانليقمزدا، او آز انسانله گئتدي
بو قدر (دفتر)و (اسناد) له ، بير حقه چاتان يوخ
حق وئرنلر (پيتيگي) ميرزا قلمدانله گئتدي
بيزه بير دين قالا بيلميشدي ميراث، بيرده بو ايران
دين گئدنده دئدي:" تك گئتمه رم! " ايرانله گئتدي
ايسته ديك قانلا يوواق ئولكه ميزين لكه سين، آمما
ئولكه ميز خالص ئوزي لكه اولوب قانله گئتدي
يورقاني اوغري قاپاندا، دئدي ملانصرالدين:
نيله سين چيلپاغيدي،اوغري دا يورقانله گئتدي
هاوا انساني بوغور باش -باشا " گاز كربنيك "
اولموش
يئل ده اسمير، ائله بير، يئل ده سليمانله گئتدي
سو، كرج دن " كلور " ايله گلي پاسلي دميرده
گوره سن " شاه سويي " تك چشمه نه عنوانله گئتدي
تركي اولموش قدغن، ديوانيميزدان دا خبر يوخ
"شهريارين" ديلي ده واي دئيه، ديوانله گئتدي.
محمد حسين شهريار
نظر لرينيز!