Gajil,Gecil,گجيل
 

گجيل

 
شعر
يازيلار - مقاله لر
اسماعيل جميلينين شعرلري
ATASÖZLERİ VE DEYİMLER

فيرچا

رسام عشقناز خانيمين ايش اوتاغيندا اوزونه اورتي چكيلميش ايكي لوحه وارايدي. او، ساعتلرجه قاپوني باغلايير، تازه ياراتديغي اثري ايشله ييردي. اونين كيچيك قيزي آزاده بو گونلر بويوك بير مراق ايچره سينده ياشاييردي. گوره سن آنام نه چكير؟ گوره سن بو ياراتديغي اثري نه وقت منه گوستره جك؟!
عشقناز خانيم اوز اثريني وطن آزادليغينين ايل دونومينه حاضيرلاييردي. بو بويوك و بختيار گونه آز قالميشدي. رسام گئجه- گوندوز راحتليك بيلمه دن چاليشيردي. بو گون كيچيك آزاده يوخودان آييلان كيمي: آناجان، سن بوگون اثريني منه گوستره جكسن، ائيله دگيلمي؟ - دئدي-.
رسام آنا سويمه لي قيزينين بوينيني قوجاقلاييب، اوني ايش اوتاغينا آپاردي. پرده لري چكدي، پنجره لري آچدي. اوتاغا عطرلي بير باهار هاواسي دولدي. پنجره لردن ائله بيل كي نور شلاله سي آخيردي. عشقناز خانيم، ياراتميش اولديغي لوحه نين اوزونده ن چهرايي اورتوگي آچدي. دونوب قيزينا باخدي، ياراتديغي اثردن توكولن نور شعله لري سانكي قيزي آزاده نين گوزلرينده پارلاييردي. آزاده اوزونده درين بير حيرت افاده سيله آناسيني قوجاقلادي. ايچيني چكدي:- آنا، بو نه قدر گوزه لدير- دئدي. عشقنازين ياراتديغي گوزه ل و بختيار بير قادين رسمي ايدي. اونون دوداقلاريندا نجيب وخوشبخت بير تبسم وارايدي. او گولومسه ييردي، او، كونلونين درينلريندن گلن شفاف، پارلاق بللوري بير تبسمله گولومسه ييردي. آزاده بو لوحه يه دويا- دويا باخير: آنا، بو گوزه ل قادين كيمدير؟- دييه خبر آليردي. عشقناز خانيم:- قيزيم، بو بيزيم آزاد وطنيميزين تمثاليدر، بو بيزيم دوغما آناميز، سويمه لي وطنيميزدير!- دئدي.
آزاده نين سئوينجينين حدودي يوخ ايدي. او بو رسمي سير ائتديكجه گولومسه ييردي. آنا- قيز رسمين قارشيسيندا دايانميش اوني سير ائديرديلر. بيردن آزاده نين گوزلري آناسينين گئنيش و ايشيقلي ايش اوتاغيندا باشقا بير شئيه ايليشدي. او، اوزه رينه قارا پرده چكيلميش بير لوحه ايدي. آزاده:- آناجان، بس او نه دير؟ اونين اوزوندن پرده ني آچ باخيم- دييه تاكيد ائيله دي. عشقناز خانيم تردد گوستردي:- لازيم دگيل قيزيم، قوي او قالسين!.. لاكن كيچيك آزاده ماراقلا تاكيد ائتدي. عشقناز خانيم قيزيندان هئچ زامان حقيقتي گيزلتمزدي. قيزيني كيچيكليكدن حقيقت يولي ايله تربيه ائيله ميشدي. آزاده، گوزلريني
اوزي قارا اورتولي لوحه يه زيلله ميش، ماراقلا گوزله ييردي. رسام قادين لوحه نين اوزونده كي قارا اورتيني گوتوردي. بالاجا قيزين گوزلري دهشتله دولموش، كورپه دوداقلاري بوزولموش، آغلاماق ايسته ييردي. او، تيتره ك دوداقلاري ايله:- آنا، بس بو كيمدير؟- دييه سوروشا بيلدي. آناسي:- بو بيزيم كئچميش اسير وطنيميزين تمثاليدير.- دئدي.
- بس اوني كيم چكيب؟!
- اوني هئچ زمان صنعتي اولمه ك بيلمه ين، بويالاري، رنگلري سولماق بيلمه ين بويوك بير رسام چكيب، قيزيم.
- بو رسامين آدي نه ايدي؟!
- او رسامين آدي خلقدير قيزيم. خلق اسير وطنين تمثاليني اوزون ايللر بويله ياراتميشدير.
آزاده نين ماراقي گئتديكجه آرتيردي.- آناجان، سن او رسام حققينده منه چوخلي دانيش- دئييردي. عشقناز خانيم قيزيني پنجره نين قاباغينداكي كورسينين اوسته اوتورتدي، سونرا بالاجا اللريني اوز اللرينه آليب اونا بئله بير حكايه دانيشدي:
(( اوزون ايللر بوندان قاباق ياد ائللي بير حكمدار بيزيم وطنيميزي ضبط ائيله دي. سيلاحلار سوسدي. ظفر بورولاري چاليندي. حكمدار الده ائيله ديگي غلبه نامينه طنطنه لي بير ضيافت وئره جيگيني اعلان ائيله دي.- مغلوب خلقيمين معتبر آداملاري بو اؤلكه نين ان قيمتلي تحفه لريني منيم ضيافتيمه گتيرسينلر- دييه امر وئردي. گونش غروب ائدن زمان جئيران دوزونده زينتلي بير سفره آچيلدي. اعيانلار گلدي. عيش- عشرت مجلسي قورولدي. حكمدار، خارا ياسديقلار، متكالر ايچينه غرق اولاراق ضبط ائتديگي اؤلكه نين آخشام گوزه لليگيني سيره دالدي. حكمدارين مجلسينه اونين امري اوزره تحفه لر گتيرديلر... آذربايجان شاعيرلرينين شيرين قوشمالاريندا وصف ائديلن نازيندا گوزه للر، اوره كلري ابدي بير قوتله يانديران يانيقلي تبريز نغمه لري، سرين بولاقلارين گوز ياشيندان دوري، صاف سويي، ياشيل داغلارين الوان و طراوتلي چيچكلري، آنالارين حسرت و اضطرابيني نقل ائدن نقشلي خالچالار، كورپه بير عاشيقين سينه سيندن قوپاريلان اينجه بير ساز و باشقا بير چوخ شئيلر حكمدارين حضورينه هديه اولاراق تقديم ائديلدي.
حكمدار قازانديغي ظفردن و آلديغي هديه لردن فرحله نه رك:- موسيقي چالينسين- دئدي. تارين عظمتلي و محتشم آهنگي كمانچانين حزين و شكايتلي سسينه قاريشدي. گوزلري الملي، ساچلارينا دن دوشموش بير مغني كونلونين درينلريندن اينيلتي بير سسله اوخوماغا باشلادي، حكمدار اونون نغمه سيني ياريدا بوراخيب:- شنليك رقصي چالينسين- دئدي. رقص باشلاندي. اوينايان قيزلارين رقصي سونسيز بير مايوسليق افاده ائديردي. حكمدار بوني دا رد ائتدي.
سونرا باده لر دولدي، شرابلار ايچيلدي. شرابين ياراتديغي صنعي نشئه مجلسي جانا گتيردي. انسانلار گولمه گه، شنلنمه گه باشلاييب عيش- عشرته دالديلار. بو زمان قاپو خدمتچيسي مجلسه گليب حكمدارا تعظيم ائيله دي، اونا بير سوزي اولديغيني بيلديردي. حكمدار نشئه ايچره سينده:- نه ايسته ييرسن، سويله- دئدي. قاپو خدمتچيسي آغ ساچلي بير قوجانين حكمدارا هديه تقديم ائتمه ك ايچون مجليسه گلمه گه اجازه ايسته ديگيني بيلديردي. حكمدار اوني رد ائيله مه دي. - بوراخ گلسين- دئدي. خدمتچي گئتدي. مجليس اوز شنليگينه دوام ائديردي. آز سونرا آغ ساچلي نوراني بير اختيار اورتايا گلدي. اونين اوزون ايللر محنتلي و چتين يوللاردان كئچيب گلديگيني افاده ائده ن فكرلي گوزلري، صنعتكار اضطرابينين درين چيزگيلر سالديغي گئنيش و آچيق آلني، چيگينلرينه قدر توكولموش قار كيمي آغ ساچلاري كمال و ذكا عالميندن نيشان وئريردي.
اونين الينده اوزي قارا اورتي ايله اورتولموش بير لوحه وار ايدي. مجليس شنليگينه دوام ائديردي، قوجا، حكمدارين قارشيسينا گلدي. سلام وئردي. الينده دوتديغي لوحه نين اوزوندن قارا اورتيني گوتوردي.
مجليس سوسدي... موسيقي و شنليك سسلري كسيلدي... قدحلر چينگيلتي ايله يئره دوشدي. انسانلارين سرخوشليغي كئچدي. صنعي صورتده ياراديلان نشئه سويودي. اختيارين گتيرديگي هديه بوتون مجليسي آغلاتدي.
اختيارين گتيرديگي لوحه وطن اضطرابلارينين جانلي تمثالي اولان اسير و گوزه ل بير قادين شكلي ايدي. اونين گوزلري اضطراب و غضبله دولي ايدي، او آغلاميردي. بو مغرور و گوزه ل اسير انسانلاري انتقاما، غضبه و آزادليغا چاغيريردي. اونين قوللاريندا زنجير واردي. بو قادين اسير وطني تمثيل ائديردي.
قوجا رسامين فيرچاسيله چكيلميش لوحه نين قوتيندن حكمدار اوزي ده بير آن ايچون دهشته گلدي. سونرا تئز اوزينه گليب:((گوتورين بو قارا كابوسي!))- دييه قيشقيرماغا باشلادي.
قوجا رسام قارا اورتوگي مضطرب گوزه لين باشينا سالدي. حكمدار يئنه:- موسيقي چالينسين، باده لر دولسون، رقص باشلانسين- دييه امرلر وئردي. لاكن نه موسيقي چالدي... نه رقص ائديلدي... نه باده لر دولدي. مجليس سوسدي... مجليس، اوستونه سو سپيلميش كيمي نفسيني چكمه دي.
رسام فيرچاسي حكمدار قيلينجينا غاليب گلميشدي... همين گئجه حكمدار وزيريني چاغيريب:- صاباح قتل ميدانيندا قوجا رسامين بويني ويريلسين!- دييه امر وئردي.
سحر بويوك گونش داغلارين داليندان عظمتله قالخديغي زمان شيپور سسلري بو گون آدام قتل اولوناجاغيني خبر وئردي. هامي ميدانا توپلاشدي. اوشاق- بويوك هامي آخيب ميدانا توكولدي، ازدحامين آراسيندان پيچيلتيلار گلير، سسلر يوكسه ليردي. بو آرا اوشاقلار ((گتيريرلر)) دييه باغيرماغا باشلاديلار. همين آندا ازدحام ايكييه آيريلدي. قوجا رسامي قوللاري باغلي حالدا گتيرديلر. او، اولوم منزلينه يئتيشدي... - قوللاريمي آچين- دئدي.- من هئچ بير شئي ايسته ميرم ، آنجاق قوللاريمي آچين... اولومه گئده نين سون ايسته يينه عمل ائده رك، اونين قوللاريني آچديلار.
قوجا رسام بويلانيب جماعت آراسيندان كيمي ايسه گوزلري ايله آختاريردي. بيردن اونين گوزلرينده بير آن ايچون سئوينج شعله سي ياندي. او، اوز شاگيرديني گورموشدي. سونرا اليني قوينونا اوزالديب اورادان بير فيرچا چيخاردي، اوني شاگيردينه اوزاتدي:- آل اوغلوم- دئدي.- بوني هئچ زامان يادلارا وئرمه !..
كتله آراسيندان قارا قيورجيق ساچلي، آهو گوزلي مغرور و دالغين بير گنج ايره لي گلدي. قوجا رسامين اليني اوپدي. سونرا فيرچاني آليب آيريلماق ايسته ديكده جلاد اوني ياخالادي. فيرچاني اليندن آلماق ايسته دي، لاكن كتله فيرتيناسي بير دنيز قوتيله گنجي اوز دالغالاري آراسيندا گيزلتدي. اوني اله وئرمه دي. قوجا رسامي قتل ائتديلر.
ايللر گلير، كئچير، زمان دگيشير. بو گون حاكم اولان حكمدارلار صاباح محكوم اولور، تختلر دگيشير، لاكن فيرچا هئچ زمان اوز قووتيني ايتيرميردي. بو فيرچايلا رسم چكه ن، لوحه يارادان بوتون رساملارين صنعتينده بويوك بير حقيقت واردي. بو فيرچا ايله بو گونه قده ر نئچه لوحه لر يارانميشديسا، هئچ بيري سئوينج افاده ائده بيلمير، هئچ بير رسامين ياراتديغي گوزه لين دوداقلاري گولومسه ميردي. بو فيرچانين ياراتديغي گوزه ل، يالنيز وطن آزادليغا چيخان زمان گولومسه دي. بو فيرچادا بويوك بير سحر قووه سي وارايدي، او دوغري اولمايان شئيي تصوير ائتمه كدن عاجيز ايدي. بو فيرچا يالنيز خلقه و حقيقته خدمت ائده رك ياشاميش، خلق ده اوني عزيز دوتموش و قوروموشدي. بو گون آزاد وطنيميزين تمثاليني يارادان همين فيرچادير كي، سن اوني سير ائديب و فرحله نيرسن...))
آزاده باياقدان بري غمله دولموش گوزلريني آناسينين آزاد و بختيار وطن تمثالينا ديكميش، خوشبخت نظرلريله گولومسه ييردي.     

نيگار رفيعبگلي
((آزاد تبريزين گله جك رسامينا اتحاف))

 

گجيل سايتي ركلاملاري وئريلن سايتلارين محتواسيندان سوروملو دگيلدير.
 بو ركلاملار ايراندا ، آذربايجان سايتلارين آرتيق راق تانيتديرماق اوچون بوردا ويريليب ديلار.


 


گجيل سايتي لينکي وئريلن سايت يا يازيلارين محتواسيندان سوروملو دگيلدير.

E-mail : webmaster@gajil.20m.com
Copyright © 2003-2004.