|
|
|
|||||||||
|
|||||||||
|
«پاسداران» آدلي بويوك يولو كئچيب عينالي داغينين اتكينه يئتيشيرم. داغي هوندور گوروب , قايتماق ايسته ييرم. آنجاق بير ياشلي كيشي گوروب اونونلا سلاملاشيب اونوندا چرشنبه گونونه خاطير عينالييا چيخماسيني بيلديكده اونونلا بيرگه عينالييا چيخماغي راحات بيليب يولا دوشورم. ياشلي كيشي منيم آديمي بيلديكده مني تانيدي. يولون اثناسيندا چوخ مسئله لردن دانيشاراق گئديرديك. « آذربايجان گنجلري كئچميش نسلين تجربه لريني دويمايب... الحاقي پروتكل ... آنا ياساميز ... انصافعلي هدايت.. و سوندا دا اود چرشنبه سي بيزيم دانيشيق قونولاريميز اولدو. ياشلي كيشي ايله داغي چيخيرام شهرين چيراقلاري هله سونمه‌ييب. شهرين هر گوشه‌سيندن تاراق- توروق سسي گلير. آراسيرا ان اوجا سسلي تاراقالار دا پارتلايير. بوگون تاراقا بازاريدي . ياشلي كيشينين اورك خسته ليينه باخماياراق منيمله بيرگه داغا چيخير. بلكه من چوخ يائاش گئديرم؟ شهردن آييريلديقجا و اوجاليغا يئتديكجه سسلر اوجالير. آتا بابالاريميز بئله‌نچي بير گونلرده هر ايل تونقاللار قالاييب اونون اوستوندن كئچيب بير بيرينه خئير دوعا دئييب قوهوم – قونشويا و ائله شادليقلا دولو بير گله‌جك آرزولاييرلاردي. ياشلي كيشي ايله داغين باشينا يئتيريك . مچيدين داليندا بير ماركت دن چاي آليب ايچيريك. ياشلي كيشي ايپ توخونما چانتاسيندان چرشنبه يئميشي چيخارير يئيه‌ك. قونشوموزون كيچيك اوغلو بهزاد ياديمي دوشور . يئددي ياشلي بهزاد عايله سينين يوخسوللوغون دوشونمه‌ييب دونن كوچه ميزده يئني پالتار و چرشنبه يئميشي اوسته چيغير باغير سالميشدي. آناسي قونشولارين يانيندا لاپ ارييب سو اولدو. ساعات آلتييا ياخينلاشير . بيزدن سونرا يئدي سكييز نفر ده داغين باشينا گليبلر. گره‌ك ساعات سككيزه قدر شهرده اولام . بير نفرله گوروشمم لازيمدير. ياشلي كيشي ايله شهره باخيريق . محتشم تبريزه باخيريق.باتي طرفده گونش قيزيل قانا باتيب و دوغو دان قاراتليقلار بيزه هجوم چكيرلر. شهرين چيراقلاري يانير. يوخسوللار وارليلارلا بيرليكده بو شهرده ياشاييرلار. شهرين چيراقلارينين ايشيغينين چوخوسو يوخسوللارين چيراق ايشيغي دير. بو جمعيت نئجه بيربيرلريله ياشاييرلار؟ ساعات يئدديه بير آز قالير. ياواش ياواش نئچه نفر عينالي داغينا چيخيرلار . بير آز كئچير . يوز دن آرتيق آدام ييغيشيب. تونقاللار قالانير. آلولار اوجالير. اوچ مين ايل اونجه يه قايديرام. قادينلار كيشي لر ياز ماهني سي بايرام ماهني سيني اوخويورلار. اودون آرخاسندان تبريزه باخيرام. تبريزه ... گنجلردن نئچه سي تاراقا آتير. داغ سسه گلير هامي ال –اله وئريب اودو اورتايا آليرلار هامي ماهني اوخويور . تبريزه باخيرام. بيريسي تاريني باغرينا باسيب . هامي اوخويور . شعير اوخونور ماهني اوخونور. ساعات يئددي ياريم دي . تبريزه قاييتمام گركلي دير. يولداشلاريمدان آيريليب يولا دوشورم . يولدا اوخويورام. داغ دا ميم له سس سسه وئريب اوخويور . بيلميرم نه زامان داغين آشاغيسينا يئتيشميشم سون علي عباسي – تبريز آخير چرشنبه |
|||||||||
|
گجيل سايتي
ركلاملاري وئريلن
سايتلارين محتواسيندان سوروملو دگيلدير. |
|||||||||
|
E-mail
: webmaster@gajil.20m.com |